4 ‘கனவா, நிஜமா?' - தமிழில் உருவாக்கப்பட்ட ஆகச்சிறந்த சித்திரக்கதை

‘ப்ரிமானிஷன்', ‘எட்ஜ் ஆஃப் டுமாரோ', ‘சோர்ஸ் கோட்' உள்ளிட்டவை கடந்த சில வருடங்களில் வெளியான ஹாலிவுட் திரைப்படங்கள். இப்படங்களின் நாயகர்கள் எதிர்காலத்தில் வரும் சம்பவங்களைக் கணிக்கக்கூடிய அல்லது எதிர்காலத்துக்கே சென்று சம்பவங்களை மாற்றியமைக்கக்கூடிய திறனைப் பெற்றவர்கள். இவையெல்லாம் சமீபத்திய வருடங்களில் வெளியானவை. ஏறத்தாழ 37 வருடங்களுக்கு முன்பே தமிழில் இதுபோல ஒரு கதை வெளியாகியிருக்கிறது, தெரியுமா?

தமிழில் குழந்தைகளுக்கான தலைசிறந்த கதைசொல்லி வாண்டுமாமாவின் படைப்பான ‘கனவா? நிஜமா?'தான் அது!

தமிழில் காமிக்ஸ் என்று எடுத்துக்கொண்டால், அது முல்லை தங்கராசன், வாண்டுமாமா மற்றும் செல்லம் என்று மூன்று ஜாம்பவான்களை மையமாகக் கொண்டது. இவற்றில் தமிழில் உருவாக்கப்பட்ட ஆகச்சிறந்த சித்திரக்கதை என்று ‘கனவா, நிஜமா?'வைச் சொல்லலாம்.

தமிழ் சித்திரக் கதைகளில் காமிக்ஸ் என்ற கதை சொல்லும் அமைப்பை மிகச் சரியாக உணர்ந்து, அதை முறையாகப் பயன்படுத்தி, வார்த்தைகளால் அல்லாமல், ஓவியங்களின் மூலம் கதையை விவரித்த படைப்பு இது.

வாண்டுமாமா + ஓவியர் செல்லம் கூட்டணி இக்கதையின் உயரத்தை இன்னமும் உச்சத்துக்குக் கொண்டுசென்றது. வாண்டுமாமாவின் மாஸ்டர்பீஸ்களிலேயே சிறந்ததாகப் பலராலும் மதிக்கப்படும் இக்கதை, வயது வேறுபாடுகளையும் காலத்தையும் கடந்து நிற்கிறது.

நாளையும் இன்றும்:

நீலன் என்ற ஒரு ஏழை ஆட்டிடையன், ஒரு நாள் மலையுச்சியில் ஒரு விசித்திர புகையை நுகர்ந்து மயக்கமுறும்போது, வித்தியாசமான கனவொன்றை காண்கிறான். தன்னுடைய வீட்டில் வேறொருவன் குடியிருப்பதையும், தற்போதைய மன்னரும் அவரது சகோதரரும் கொல்லப்பட்டு, இன்றைய சேனாதிபதி மன்னராகி இருப்பதும், தளபதி ஒருவர் மட்டும் தப்பித்து, இவர்களை எதிர்த்து போராடுவதும் அவனுடைய கனவில் வரும் முக்கிய சம்பவங்கள். இவை அனைத்துமே பத்து ஆண்டுகள் கழித்து நடைபெறப்போகும் சம்பவங்கள். மறுபடியும் மயக்கமுறும் நீலன், தன்னுடைய இன்றைய காலகட்டத்தில் திரும்பி இருப்பதை உணர்கிறான். அதாவது நிகழ் காலத்திற்கு.

என்ன செய்வதென்றே தெரியாத குழப்பமான மனநிலையில் இருக்கும் நீலன், பின்னர் தெளிவுறுகிறான். தன்னுடைய வீட்டருகே தற்போது சிறிய  செடியாக இருப்பதே, பத்தாண்டுகள் கழித்து தன்னுடைய கனவில் பெரிய மரமாகி இருப்பதை உணரும் அவன், அந்த செடியை வேரோடு பிடுங்கி விடுகிறான். தன்னுடைய இந்த செயலான,து பின்னர் மரமாகப்போகும் அந்த செடியின் எதிர்காலத்தை மாற்றியது போல, தன கனவில் கண்ட மற்ற நிகழ்வுகளையும் மாற்ற முடிவெடுக்கிறான். துணிந்து மன்னரிடம் செல்கிறான். ஆனால், அவனது வாதத்திற்கு எந்த விதமான ஆதாரமும் இல்லாத சூழலில், மன்னர் அவனை மனநலம் தவறியவன் என்றெண்ணி சிறையில் அடைக்க சொல்கிறார்.

சிறையில் இருக்கும் நீலனை மன்னரின் இளைய சகோதரன் சேனாதிபதியுடன் வந்து சந்தித்திக்கிறார். பத்து வருடங்கள் கழித்து இதே சேனாதிபதிதான் நீலனை காப்பாற்றுவது என்பதால், நீலனுக்கு அவரை தெரிகிறது. சேனாதிபதி அவர்களின் உடலில் இருக்கும் (வெளி ஆட்கள்  யாருக்கும் தெரியாத) அடையாளம் ஒன்றை சொல்லும் நீலன் அவர்கள் இருவரின் நம்பிக்கையை பெறுகிறான். நீலனின் கூற்றில் இம்மியளவும் உண்மை இருந்தால், தங்களின் உயிருக்கு ஆபத்தேற்படுவதோடில்லாமல், நாட்டின் எதிர்காலமே சீர்குலையும் அபாயம் இருப்பதை அவ்விருவரும் உணர்கின்றனர். மன்னரின் சகோதரர் நீலனை கோட்டையின் அகழியில் தள்ளிவிட்டு விட்டு, ’தப்பித்து சென்று, இந்த நாட்டின் எதிர்காலத்தை காப்பாற்று’ என்று சொல்வதுடன் முதல் பாகம் முடிவடைகிறது.

• நீலன் என்னவானான்?
• அவனால் அகழியை உயிருடன் கடக்க முடிந்ததா?
• தளபதியின் திட்டங்கள் நடந்தேறியதா?
• மன்னர் கொல்லப்பட்டாரா? 
• அல்லது நீலன் தன்னுடைய திட்டப்படி இந்த நிகழ்வுகளை நிறுத்தினானா ?
• எவ்வாறு இது நடக்கும்?
• ஒரு நாட்டின் எதிர்காலத்தை ஒரே ஒரு தனி நபரால் மாற்ற இயலுமா?

என்று பல கேள்விகளுக்கு விடையளிக்கும் வகையில் இரண்டாம் பாகத்தில் பல விறுவிறுப்பான சம்பவங்கள் நடந்தேறுகின்றன. விறுவிறுப்பான கதையுடன் உயிரோட்டம் நிறைந்த சித்திரங்கள் கொண்ட இந்த தொடர் கல்கி வார இதழில் தொடராக வந்தபோது மிகுந்த வரவேற்பைப் பெற்றிருந்தது.

அற்புத அறிவியல் புனைவு

குழந்தைகள் ஆண்டாக அறிவிக்கப்பட்ட 1979-ம் ஆண்டு 'கல்கி' வார இதழில் 25 வாரத் தொடராக வெளிவந்த இந்தக் கதை, தமிழின் ஆகச்சிறந்த சித்திரக்கதைப் படைப்பாகத் தேர்ந்தெடுக்கப்பட நிறைய காரணங்கள் உள்ளன.

• இதற்கு முன்னர் தமிழில் சில 'சயின்ஸ் ஃபிக்‌ஷன்' காமிக்ஸ் வந்திருந்தாலும், சரியான லாஜிக்குடன் படைக்கப்பட்ட முதல் படைப்பு இது.
• சயின்ஸ் ஃபிக்‌ஷன் கதைகள் பெரும்பாலும் சமகாலத்திலேயே நிகழ்வதாகப் படைக்கப்பட்டிருக்கும். ஆனால், அக்காலத்திய மரபுப்படி மன்னர் காலத்துக் கதையின் ஊடே ‘ப்ரிமானிஷன்' பற்றிய விளக்கத்தை எளிமையாகப் புரிந்துகொள்ளும்படி வடிவமைக்கப் பட்டிருப்பது கதையின் நேர்த்தி.
• நிகழ்காலத்தில் சிறிய செடியாக இருப்பதுதான் பத்தாண்டுகளுக்குப் பிறகு மரமாகவிருப்பதை உணர்ந்து, அதை வேரோடு பிடுங்கி, எதிர்காலத்தை மாற்ற முடியும் என்பதை ஒரே ஒரு ஓவியத்தின் மூலம் விளக்கிய எளிமையான கதை சொல்லும் பாணி இந்தக் கதையின் வெற்றிக்கு முக்கியக் காரணம்.

புதுமை ஓவியப் பாணி

• கஸ்தூரி ராஜா, வி. சந்திரன் போன்ற சித்திரக்கதை ஜாம்பவான்கள் வழியில் புள்ளிகளை மட்டுமே கொண்டு, கறுப்பு வெள்ளையில் நிழலூட்டும் ஓவியப்பாணியான ‘ஸ்டிப்ளிங்' என்ற தனி ‘ஷேடிங்' முறையை ‘ஓவிய மேஸ்ட்ரோ' செல்லம் இக்கதையில் சிறப்பாகப் பயன்படுத்தியிருக்கிறார்.
• முழு வண்ண ஓவியங்களில் பலவகையான அடர்த்தியில் வண்ணங்களை ஏற்றலாம். கறுப்பு வெள்ளை ஓவியங்களில் தோற்ற ஆழம் கொடுக்கப் பயன்படும் ‘கியாரஸ்க்யூரோ' என்ற ஓவியப் பாணியை தமிழுக்கு, வெகுஜனப் பத்திரிகையில் முறையாக அறிமுகப்படுத்தியது இந்தக் கதைதான்.
• வாரத்துக்கு இரண்டு பக்கங்கள் என வெளியான இக்கதை, தொடர்கதைகளுக்கே உரித்தான ஒரு முடிச்சை இரண்டு பக்கங்களுக்கொரு முறை கொண்டிருந்தாலும்கூட, முழுக் கதையாகப் படிக்கும்போது உறுத்தல் இல்லாமல்தான் இருக்கிறது.

கனவா, நிஜமா?

கதை: வாண்டுமாமா

ஓவியம்: செல்லம்

பக்கங்கள்: கறுப்பு வெள்ளையில் 52 பக்கங்கள்

அமைப்பு: 1979-ல் 25 வாரத் தொடர்கதையாக வெளியானது.

குறிப்பு: இந்தியாவின் ஆகச்சிறந்த கிராஃபிக் நாவல்கள் என்ற பட்டியலை 2016ஆம் ஆண்டு தி இந்து தமிழ் நாளிதழில் வெளியிட்டபோது, கனவா, நிஜமா? அந்த வரிசையில் மிக முக்கியமான இடத்தைப் பிடித்தது.

நன்றி: தி இந்து – தமிழ் நாளிதழ்

25 VanduMama (21 April 1925 - 12 June 2014) வாண்டுதேசத்தின் மாமன்னர்

Dear ComiRades,

Welcome back to TCU. As Yours truly was gearing up for the launch of “TCU Books” publication, a shocking news was awaiting: Vandu Mama: Greatest Ever Story Teller in Tamil For Children of All Ages passed away. Here is a tribute paid by Yours truly & this appeared in The Hindu (Tamil Daily news paper) on Sunday, 15th June 2014.

வாண்டுதேசத்தின் மாமன்னர்

தமிழர்கள் பலரது இளம்பிராயக் கற்பனைகளை, சாகசக் கனவுகளை வார்த்தைகளால் வடிவமைத்தவர் வாண்டுமாமா (21 ஏப்ரல் 1925 - 12 ஜூன் 2014). சித்திரக் கதைகள், சிறுவர் நாவல்கள், சாகசக் கதைகள் என்று பலதளங்களில் இயங்கியவர் அவர். படிப்பவர்களைச் சுண்டியிழுக்கும் வசீகரம் கொண்டது அவருடைய எழுத்து நடை. சூரியனுக்குக் கீழே உள்ள எதைப் பற்றியும் சுவாரஸ்யமாக எழுதக் கூடிய வித்தைக்காரர் அவர். அறிவியல் என்றாலே காத தூரம் ஓடிய மாணவர்கள்கூட ரசித்துப் படிக்கும் வகையில் அறிவியல் தொடர்பான கட்டுரைகளையும் குறிப்புகளையும் சுவையுடன் வழங்கியது அவரது தனிச் சிறப்பு. அவர் உருவாக்கிய சாம்ராஜ்யத்தின் குடிமக்கள் அனைவரும் குழந்தைகளாகத்தான் இருந்தனர். குறைந்தபட்சம் குழந்தை மனது கொண்டவர்களாக!

புதுக்கோட்டை அருகில் இருக்கும் அரிமழம் கிராமத்தில் 1925-ம் ஆண்டு பிறந்த வி.கிருஷ்ண மூர்த்திதான், பின்னாளில் வாண்டுமாமா ஆனார். திருச்சி லால்குடி திண்ணியம் கிராமத்தில் வளர்ந்த இவர், பாரதி என்ற கையெழுத்துப் பத்திரிகையை நடத்தினார். சென்னையில் நடந்த கையெழுத்துப் பத்திரிகைகள் மாநாட்டில் இவரது பத்திரிகை முதல் பரிசு பெற்றது.

கலைமகள் இதழில் வெளியான குல்ருக் என்ற கதையின் மூலம் பள்ளியில் படிக்கும்போதே எழுத்தாளர் ஆகிவிட்டார். குடும்பச் சூழ்நிலை காரண மாகக் கல்லூரிப் படிப்பைத் தொடர முடியாமல் அப்போதே திருச்சியில் இருந்த பல நிறுவனங்களின் விளம்பரப் பலகைகள், பிரசுரகர்த்தர்களின் புத்தக அட்டை, உள்பக்கப் படங்கள் வரையும் கமர்ஷியல் ஆர்ட்டிஸ்ட்டாகச் செயல்பட்டார். சென்னையில் சில காலம் இருந்துவிட்டு, திருச்சிக்கே திரும்பி சிவாஜி இதழில் துணை ஆசிரியராகச் சேர்ந்தார். அதன் பின்னர், வானவில் என்ற பத்திரிகையின் ஆசிரியராக உயர்ந்தார். இந்த வானவில்தான் வாண்டுமாமா உருவாக்கிய முதல் சிறுவர் இதழ். அதன் பின்னர் மின்னல், சிவாஜி சிறுவர் மலர், கிண்கிணி, அரு. இராமநாதனின் பத்திரிகைகளான கலைமணி, காதல் போன்ற பத்திரிகைகளில் பணிபுரிந்தார்.

அரு. இராமநாதனின் காதல் பத்திரிகை சென்னைக்கு இடம்பெயர்ந்தபோது, இவரும் சென்னைக்குக் குடிபெயர்ந்தார். பின்னர் அரு. இராமநாதனுடன் ஏற்பட்ட சிறு மனஸ்தாபத்தால் மறுபடியும் திருச்சிக்கே திரும்பி ஒரு பள்ளியில் நூலகராகப் பணிக்குச் சேர்ந்தார். பின்னர், சென்னைக்குத் திரும்பி விகடன், குமுதம் என்று பல பத்திரிகைகளில் முயன்று, பிறகு கல்கி அதிபர் சதாசிவத்தைச் சந்தித்தார். இவரது திறமையைக் கண்டுவியந்த சதாசிவம், உடனடியாக வேலைக்குச் சேர்த்துக்கொண்டார்.

விற்பனைப் பிரிவு குமாஸ்தாவாகத்தான் கல்கியில் சேர்ந்தார். ஆனால், வெகுவிரைவில் ஆசிரியர் குழுவில் சேர்க்கப்பட்டார். பின்னர், சிறுவர் விருந்து என்ற பல்சுவைப் பகுதியைக் கல்கியில் கொண்டுவந்தார். பல ஆண்டுகள் கல்கியில் பல சித்திரக் கதைகளையும், சிறுவர் கதைகளையும் தொடர்ந்து எழுதிவந்தார். அப்போது, கல்கி நிறுவனம், கோகுலம் என்ற சிறுவர் பத்திரிகையை ஆரம்பித்தது. சிறுவர் இலக்கியப் பத்திரிகைகளில் இது மிகவும் முக்கியமான ஒரு நிகழ்வு. அதுவரை ஒரு சிறிய வட்டத்திலேயே நடத்தப்பட்டுவந்த சிறுவர் பத்திரிகை, முதன்முறையாக ஒரு பெரிய நிறுவனத்தால் இந்தியாவெங்கும் சிறப்பாக வெளியிடப்பட்டது.

கோகுலம் இதழில்தான் வாண்டுமாமா தன்னுடைய புகழ்பெற்ற கதாபாத்திரங்களாகிய பலே பாலு, சமத்து சாரு போன்றவற்றை உருவாக் கினார். தொழிலாளர் பிரச்சினை காரணமாக கல்கி இதழ் வெளிவருவது நின்றபோது, குங்குமம் பத்திரிகையில் சேர்ந்தார். மறுபடியும் கல்கி-கோகுலம், பின்னர் தினமணிக்கதிர் என்று தன்னுடைய திறமையை வெளிப்படுத்திய இவர், பணி ஓய்வுபெற்ற பின்னர் கேரளத்தின் பூம்பட்டா நிறுவனம் வெளியிட்ட பூந்தளிர் இதழின் நிர்வாக ஆசிரியராகச் சேர்ந்தார். பூந்தளிர் அமர் சித்திரக் கதை, பைகோ கிளாசிக்ஸ் போன்ற இதழ்களையும் திறம்பட நிர்வகித்தார் வாண்டுமாமா. இவற்றில் வெளிவந்த கதைகளை மொழிமாற்றம் செய்ததும் இவரே. அந்த இதழ்களின் நிறுவனர் தினேஷ் பையின் மறைவுக்குப் பின்னர், பூந்தளிரும் நின்றுபோனது. பிற்காலத்தில் வாண்டுமாமாவே சொந்தமாகப் பூந்தளிரை வெளியிட்டார்.

புற்றுநோய் காரணமாக, கடந்த 15 ஆண்டுகளாகச் சரியாகப் பேச முடியாமல் இருந்தார் வாண்டுமாமா. அவரது எண்ணங்களை சைகைகள் மூலமே புரிந்துகொண்டு செயல்பட்ட அவருடைய மனைவி சாந்தா, கடந்த ஆண்டு மறைந்த பின்னர், மனதளவில் மிகவும் தளர்ந்திருந்த வாண்டுமாமா வியாழக்கிழமை இரவு காலமானார். தன்னுடைய வாழ்நாள் முழுவதையும் சிறுவர் இலக்கியத்துக்காக அர்ப்பணித்த வாண்டுமாமா, பொருளாதாரரீதியான சிரமங்களை எதிர்கொள்ள நேர்ந்தது ஒரு துயரம். வாண்டுமாமாவின் இடத்தை வேறு எவராலும் நிரப்ப முடியாது என்பது சம்பிரதாயமான வாக்கியம் அல்ல. நம்முள் உயிர்ப்புடன் இருக்கும் இளம்பிராயத்தின் விசும்பல் அது.

பின்குறிப்பு: வாண்டுமாமாவின் சித்திரக் கதைகளை ‘தமிழ் காமிக்ஸ் உலகம்’ காப்புரிமை பெற்று விரைவில் வெளியிடவிருக்கிறது.

வாண்டுமாமா விட்டுச்சென்ற செய்தி:

வாழ்க்கைதான் என்னைக் குழந்தை எழுத்தாளனாக ஆக்கியது. ஓவியனாக வேண்டும் என்றுதான் இளம் வயதில் ஆசைப்பட்டேன். அதுதான் என் கனவாக இருந்தது. அதே கனவுடன்தான் பத்திரிகைத் துறையிலும் நுழைந்தேன்.

வானவில் பத்திரிகைக்காகத்தான் நான் வாண்டுமாமா ஆனேன்.

குழந்தைகள் இலக்கியம் என்பது ஒரு தனி உலகம். பெரியவர்களுக்கான உலகின் தர்க்க நியாயங்களுக்கெல்லாம் அப்பாற்பட்டது அது. குழந்தை எழுத்தாளன் ஒருவகையில் தானே குழந்தையாகிவிடுகிறான். காலமெல்லாம் குழந்தையாக இருப்பது எத்தனை பெரிய பாக்கியம்!

இந்தக் காலக் குழந்தைகள் பாவம் என்று சொல்லத் தோன்றுகிறது. இவர்களுக்கென்று எழுத யாருமே இல்லையே. நவீன சாதனங்களின் வளர்ச்சி வரவேற்கக் கூடியதுதான். எனினும், அவைதான் வாழ்க்கை என்றால் அது என்ன வாழ்க்கை?

உங்கள் குழந்தைகளுக்குக் கதை சொல்லுங்கள். படிக்கச் சொல்லுங்கள். கதைப் புத்தகங்கள் வாங்கிக்கொடுங்கள்.

 After the tribute got published in the newspaper, many letters also reached and got published in the letters to the editor page. You can also contribute by mailing to editpage@thehindutamil.co.in  Here are some:

As usual, post your comments in the comments section. For those who want to Pen their thoughts in Tamil, Kindly Use the Option Provided in the Widget section or Click Here.

Thanks & Regards, 
King Viswa.

3 Comic Cuts 52 – News 52: வாண்டுமாமா is Back

டியர் காமிரேட்ஸ்,

கடந்த ஒரு மாதமாக, இன்றைய தினம் தமிழ் காமிக்ஸ் உலகில் ஒரு மறக்க முடியாத தினமாக இருக்கும் என்று என்னுடைய நண்பர்களிடம் சொல்லிக்கொண்டு வந்தேன். அதற்க்கான காரணம் என்ன என்பதை யாரிடமும் சொல்லவேண்டாம் என்று சம்பந்தப்பட்ட நபர்கள் கேட்டுக்கொண்டதால் காரணத்தை மட்டும் சொல்லாமல் தவிர்த்து வந்தேன்.

உங்களுக்கு மிகவும் சந்தோஷத்தை தரக்கூடிய ஒரு சங்கதியை உங்களிடம் சொல்லிவிட்டு அதனை குறிப்பிட்ட காலம் வரையில் யாரிடமும் சொல்ல வேண்டாம் என்று பூட்டு போடுவதை விட கொடுமையான விஷயம் இருந்தால் எனக்கு தெரியப்படுத்துங்களேன், ப்ளீஸ்?

எனிவே, இன்று முதல் வெளிவர துவங்கியுள்ள The Hindu குழுமத்தின் தமிழ் தினசரியை பற்றியதே அந்த தகவல். கடந்த நான்கு மாதங்களாக என் நண்பர்கள் ஒவ்வொருவராக அங்கே சேர்ந்தவண்ணம் இருந்தனர். சில விஷயங்களை பற்றி தீவிரமாக விவாத்தித்தோம். அதைப்பற்றியெல்லாம் பின்னால் எழுதுகிறேன். இப்போது முதன்மையான தகவல்.

The Return of வாண்டுமாமா: பத்தாண்டுகளுக்கு முன்பாக ஒரு வெகுஜன பத்திரிகையில் வாண்டுமாமா அவர்களின் சித்திரக்கதை வெளிவந்தது. அதற்க்கு பிறகு அவரது புத்தக தொகுப்புகள் பதிப்பகங்களால் வெளிவந்தாலும் (Special Thanks to வானதி பதிப்பகம்), அனைவரும் படிக்கும் வெகுஜன பத்திரிக்கைகளில் அவரது பங்களிப்பு இல்லாமல் போனது இந்த தலைமுறைக்கு மிகப்பெரிய சாபக்கேடு.

அதனை சரிகட்டும் விதமாக இன்றைய தி ஹிந்து தமிழ் தினசரி பத்திரிகையில் சிறுவர் இலக்கிய சிந்தனை சிற்பி வாண்டுமாமா அவர்களின் புதிய ஸ்ட்ரிப் ஒன்று துவங்கியுள்ளது. நேற்று முகப்புத்தகத்தில் (For the Un initiated, நம்ம Facebook தாங்க!) தினத்தந்தியின் கன்னித்தீவு பற்றி எழுதி  ஒரு Hint கொடுத்திருந்தேன்.இந்த ஸ்ட்ரிப் உருவான பின்னணியை சொன்னால்..... வேண்டாம். நம்ம சுயசரிதம் எழுதும்போது அதனைப்பற்றி பேசுவோம், ஒக்கே? இப்போதைக்கு இந்த ஸ்ட்ரிப்பை பார்த்து, படித்து மகிழுங்கள்.

நமது ப்ளாக்கை தொடர்ந்து படித்து வரும் காமிரேட்டுகளுக்கு வாண்டுமாமாவின் பலே பாலுவைப்பற்றி நன்றாக தெரியும். புதியதாக படிப்பவர்கள் இந்த பதிவை படித்து விவரங்களை தெரிந்து கொள்ளுங்கள். பலே பாலுவும் பாட்டில் பூதமும் (அறிமுகம் 1 அறிமுகம் 2) என்கிற பிரபலமான அவரது தொடரின் Re Boot வெர்ஷனாக இந்த கதையை பார்க்கிறேன். நண்பர்களுக்கு ஒரு போனசாக இந்த கதையின் இரண்டாவது பகுதியையும் இங்கே அளிக்கிறேன் (இந்த பதிவு இடப்ப்படும்போது இரவு மணி ஒன்று). 

தினத்தந்தி - கன்னித்தீவு - முழு வண்ணத்தில்: இன்றுமுதல் ஹிந்து குழுமத்தில் இருந்து புதியதாக தமிழில் தினசரி (தி இந்து ) என்று ஆரம்பாமாகியுள்ளது. இந்தன் வருகையை எதிர்நோக்கி ஏற்கனவே களத்தில் இருக்கும் தினசரிகள் போட்டி போட்டுக்கொண்டு அமர்க்களம் செய்ய துவங்கி விட்டன.

1.தினகரன் ஏற்கனவே ஒரு மாதத்திற்கு முன்பாகவே எடிட்டோரியலில் இருந்து கன்டென்ட் வரை அனைத்தையும் புதுமையாக பேக்கேஜ் செய்ய துவங்கி விட்டார்கள். தினகரனில் செய்யப்பட்ட மாற்றங்கள் நன்றாகவே இருக்கிறது.

2. தின இதழ் (சென்னை மற்றும் திருவள்ளூர்) இந்த வாரம் முதல் 4 ருபாய் என்று இருந்த விலையை 2 ரூபாயாக குறைத்து இருக்கிறார்கள்.

3. தினகரன் போலவே தினத்தந்தியும் முழுமையான வண்ண தினசரியாக மாற்ற ஆரம்பித்து இருக்கிறார்கள். அதன் முதல் வடிவம் நேற்று (ஞாயிற்று கிழமை முதல்).

எது நடக்கிறதோ இல்லையோ, வண்ணத்தில் முதன்முறையாக கன்னித்தீவு தொடர் சித்திரக் கதையை பார்ப்பது ஒரு அற்புதமான அனுபவம். 18,920 நாட்கள் கருப்பு வெள்ளையில் வந்த இந்த தொடர் (51 வருடங்கள் மை லார்ட், 51 வருடங்கள்) முழு வண்ணத்தில் மெருகூட்டப்பட்ட ஓவியத்தரத்துடன் சிறப்பாக இருக்கின்றது. இனிமேல் தினத்தந்தியும் வாங்க வேண்டும் போலிருக்கிறதே?

சில பல சாம்பிள் ஸ்கான்களை கண்டு மகிழுங்கள்: மாலைமதி காமிக்ஸ் கடைசி இதழில் (அக்டோபர் 1976) பின் அட்டையில் இனிமேல் மாலைமதி காமிக்ஸ் மாலைமதி நாவலாக, வார இதழாக வெளிவரும் என்று விளம்பரம் செய்தார்கள். அதனாலேயே அந்த விளம்பரம் இன்றளவும் காமிக்ஸ் ரசிகர்களால் மறக்கப்படாமல் இருக்கிறது.

அதைப்போலவே தினத்தந்தியின் கன்னித்தீவு கதைத்தொடர் முழு வண்ணத்திற்கு மாறுவது சிறப்பு என்றால் அதன் கடைசி கருப்பு வெள்ளை ஸ்ட்ரிப் பிற்காலத்தில் மதிக்கப்படும் (என்று நம்புகிறேன்). ஆகையால் அதனை உங்களின் பார்வைக்கு முன்வைக்கிறேன்.

2013ம் ஆண்டு செப்டம்பர் மாதத்தின் 15ம் நாளான ஞாயிற்று கிழமை சித்திரக்கதை வரலாற்றில் இடம் பெற்றது எதனால் என்று கேள்வி எழுந்தால், அதற்க்கு நீங்கள் சொல்ல வேண்டிய பதில் - அன்று முதல் தான் கன்னித்தீவு முழு வண்ணத்தில் வெளிவர ஆரம்பித்தது என்பதே. இதோ அந்த முதல் ஸ்ட்ரிப்:

போனசாக இரண்டாவது ஸ்ட்ரிப்பும்: நண்பர்களே, நேரமின்மையால் பல தகவல்களின் பின்புலத்தை பற்றி எழுதாமல் வெறும் ஸ்கான் மட்டுமே அளிக்கிறேன். படித்து இன்புறுங்கள்:

1. Times Of India – Star Wars

 

2. Deccan Chronicle – Super Man – Action Comics

3. Deccan Chronicle – TinTin Car Race

4. Deccan Chronicle – Daley’s Comics Book

5.Deccan Chronicle – Disney’s Cartoon Characters

 

6. Salman Khan Inspires Gaming Character

7. Anifest 2013 – News Update

8. News about early reading Habits

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.

17 Comic Cuts 50 – News 50: வாண்டுமாமாவின் பேட்டி

டியர் காமிரேட்ஸ்,

அனைவருக்கும் வணக்கம்.புதிதாக வாங்கிய செல்போனை தொலைத்து சோகத்துடன் இடப்படும் பதிவு இது என்பதால் ஆங்காங்கே மென்சோக வெளிப்பாடு இருந்தால் மன்னிக்கவும். ஆந்திராவுக்கும் எனக்கும் என்ன ஏழாம் பொருத்தம் என்று தெரியவில்லை. சென்ற ஆண்டு செப்டம்பர் மாதம் அங்கு சென்று இருந்தபோது என்னுடைய கண்ணாடியை தொலைத்து விட்டு அவஸ்தை பட்டேன் (கண்ணாடி இல்லாமலேயே மும்பை காமிக் கான் சென்று திரும்பியது தனி கதை). இந்த முறை செல்போன். அந்த மட்டிலும் புதிய செல்போன் என்பதால் பெரிய நஷ்டமில்லை.

பழைய செல்போன் என்றால் அதில் இருக்கும் தகவல்களையும்,எண்களையும் மறுபடியும் ஒன்று சேர்க்க பிரம்ம பிரயத்தனம் செய்திருக்க வேண்டியது இருக்கும். அந்த வகையில் புதிய கைபேசி தொலைந்தது ஒருவகையில்  நன்மையே.இனிமேலும் சொந்த கதை சோகக்கதையை வளர்க்காமல் இந்த தகவல் பதிவுக்கு செல்வோம்.

வாண்டுமாமா அவர்களைப்பற்றி மூன்று ஆண்டுகளுக்கு முன்பு வரை இணையத்திலும் சரி, பத்திரிக்கைகளிலும் சரி பெரியதாக தகவல் எதுவும் இல்லாத நிலையில் நம்முடைய தளத்தில் முதன் முதலாக அவரது புகைப்படத்துடன் கூடிய தகவல் பதிவும் சிறியதொரு பேட்டியும் வெளியாகி இருந்தது. அதன் பின்னர் சென்ற ஆண்டு ஆனந்த விகடனில் காமிரேட் சமஸ் அவர்களால் மறுபடியும் மீடியா வெளிச்சத்தில் வந்தார் வாண்டுமாமா.

இப்போது மதிப்பிற்குரிய அகிலா கண்ணதாசன் அவர்களின் விடா முயற்சியால் நேற்றைய The Hindu தினசரியில் வாண்டுமாமா அவர்களின் புதிய பேட்டி ஒன்று ஆங்கிலத்தில் வெளியாகி இருக்கிறது. இரண்டு வாரங்களுக்கு முன்பாக (வாண்டுமாமா அவர்களின் உடல்நலன் காரணமாக) தொடர்ந்து இரண்டு நாட்கள்  எடுக்கப்பட்ட அந்த பேட்டியும் புகைப்படமும் இங்கே வழங்குவதில் மிகவும் மகிழ்ச்சி அடைகிறேன்.

தொடர்ந்து விடாமுயற்சியுடன் பேட்டியை முடித்து அதனை அழகாக எடிட் செய்து வெளியிட்ட அகிலா கண்ணதாசன் அவர்களுக்கும், The Hindu நாளிதழின் Metro இணைப்பின் எடிட்டருக்கும், The Hindu நாளிதழுக்கும் தமிழ் காமிக்ஸ் உலகம் சார்பாக மனமார்ந்த நன்றி. தன்னுடைய வாழ்நாளின் பெரும்பகுதியை சிறுவர்களுக்காகவே பயன்படுத்திய வாண்டுமாமா அவர்களுக்கு நாம் செய்ய வேண்டியது இன்னமும் எவ்வளவோ உள்ளது.

காமிக்ஸ் உலகில் டின்டின் படைப்பாளியின் ஆவணப்படம் (தமிழில் சொல்வதெனின் (Documentary) மிகவும் புகழ் பெற்ற ஒன்று. நான் தமிழ் காமிக்ஸ் வரலாறு பற்றிய ஆவணப்படம் தொடங்க எத்தனித்தபோது இயக்குனர்/நண்பரொருவர் என்னை அழைத்து அந்த டின்டின் ஆவணப்படத்தை எனக்கு அன்பளிப்பாக கொடுத்து குறைந்தது மூன்று முறையாவது அதனை பாருங்கள் என்று அன்புக்கட்டளையும் இட்டார்.

அதில் இருந்து காமிக்ஸ் சார்ந்த ஆவணப்படங்களை தொடர்ந்து தேடிப்பிடித்து பார்த்து வருகிறேன். அந்த வகையில் என்னுடைய மனம் கவர்ந்த கெவின் & ஹாப்ஸ் (உச்சரிப்பு உதவி - எழுத்தாளர் எஸ்.ராமகிருஷ்ணன்) பற்றிய ஆவணப்படம் இந்த ஆண்டு தீபாவளி அருகாமையில் வரப்போகும் தகவல் உவகை அளிக்கின்றது.

வார்விக் பல்கலைக் கழகத்தை சேர்ந்த ஆராய்ச்சியாளர் Dr Christopher Moron (என்னே ஒரு பெயர்?) ஜேம்ஸ் பான்ட் கதாசிரியர் இயன் பிளெம்மிங்'ன் De-Classified கடிதங்களையும், அறுபதுகளில் வெளிவந்த பல பேட்டிகளையும் ஒருங்கே அவதானித்து சில பல சுவையான தகவல்களை அளிக்கிறார். இயன் பிளெம்மிங்கும் அப்போதைய CIA தலைவர் Allen Dullessம் நட்பு ரீதியாக மரியாதை கொண்டவர்களாக இருந்தனர் என்பதை பின்புலத்தில் கொண்டு மேலே படிக்கவும். 

ஜேம்ஸ்பான்ட் கதைகளில் வருவது போல ஸ்பெஷல் கருவிகளை தயாரிக்க CIA முயன்றது. குறிப்பாக From Russia With Love (ராணி காமிக்ஸ் அழகிய ஆபத்து) படத்தில்/கதையில் வரும் ரஷ்யநட்டு வில்லி ரோஸா க்ளேப் போல ஷூ முனையில் விஷம் தோய்ந்த சிறு ஊசியை / கத்தியை CIAவினர் தயாரித்தனர். அந்த கதையின் முடிவில் ஜேம்ஸ் பான்ட் இடம் தோற்றுவிடுவதை பொறுக்கமுடியாத ரோஸா, ஜேம்ஸை இந்த விஷ ஊசி/கத்தி  மூலம் உதைக்க, அதனால் ஜேம்ஸ் மருத்துவமனைக்கு சென்று மீள்வதெல்லாம் தனி கதை.

அதைப்போலவே இயன் பிளெம்மிங் இந்த கால கட்டத்தில் எழுதிய கதைகளில் எல்லாம் CIA பற்றிய உயர்வான கண்ணோட்டதோடே எழுதி இருப்பார். ஒற்றைக் கை ஃபெலிக்ஸ் ரைட்டரை யாருக்காவது நினைவுக்கு வருகிறதா? பல கதைகளில் ஜேம்ஸ் பாண்டுக்கு உதவி செய்து இருப்பார். ராணி காமிக்ஸ் மந்திர  தீவு கதையில் அவரது ஒரு கையை சுறாமீன் ஒன்று கடித்துவிட, அதற்க்கு காரணமானவனை ஜேம்ஸ் பான்ட் பழி வாங்குவார். இந்த CIA உளவாளி தொடர்ந்து கதைகளில் வருவதற்கு இவர்களது நட்பே முக்கிய காரணமாக இருக்குமோ?

இன்னுமொரு முக்கியமான விஷயம்: தமிழ் ஆங்கிலத்தில் வெளிவரும் பெரும்பாலான தினசரி, வார இதழ்களை நான் வாங்கி வருகிறேன். அவற்றில் வரும் காமிக்ஸ் குறித்தான சங்கதிகளை இங்கே பரிமாறியும் வருகிறேன்.

சில சமயம் பயணம்-பணி நிமித்தமாக சிலவற்றை தவற விடுவதும் உண்டு. ஆகையால் தோழர்கள் தமிழ் காமிக்ஸ் குறித்தான தகவல்களோ அல்லது சுவையான காமிக்ஸ் குறித்த தகவலோ ஏதேனும் பத்திரிக்கையிலோ,வார இதழிலோ வெளிவந்தால் உடனடியாக ஒரே ஒரு மின்னஞ்சல் அனுப்புமாறு வேண்டுகிறேன்.

 

எந்த ஒரு தகவலையும் நீங்கள் ஸ்கான் செய்யவோ, போட்டோ எடுக்கவோ தேவை இல்லை. வெறும் இப்படி ஒரு செய்தி வந்துள்ளது என்று தகவல் அளித்தாலே போதுமானது. உங்கள் தகவலுக்கான கிரெடிட் கண்டிப்பாக இங்கேயே அளிக்கப்படும்.

நீங்கள் மின்னஞ்சல் அனுப்ப வேண்டிய முகவரி: tamilcomicsulagam@gmail.com

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய  கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.

11 Comic Cuts 42–News 42: சிறுவர் இலக்கிய சிந்தனைசிற்பி திரு வாண்டுமாமா அவர்களின் பேட்டி + ஓவியர் மாயா அவர்களின் நேர்காணல்

காமிரேட்ஸ்,

அனைவருக்கும் வணக்கம். கடந்த இரண்டு வாரங்களாகவே ஏகப்பட்ட புத்தகங்கள்,பரிசுகள் என்று மிகவும் குதூகலமாக கழிந்தது. இணையதள பக்கம் வரமுடியாதது தான் ஒரே பிரச்சினை. அதனை சரி கட்டும் விதத்தில் இன்று முதல் ரெகுலர் ஆக பதிவிட உத்தேசித்து உள்ளேன். நாட்டிற்கு இதனால் நன்மை எதுவும் பயக்கப்போவதில்லை என்றாலும், இன்றுமுதல் பதிவுகள் தொடரும்.

மிக நீண்ட நாட்களாகவே மெயின் ஸ்ட்ரீம் மீடியாவில் வாண்டுமாமா அவர்களைப்பற்றி எந்தவிதமான கட்டுரைகளும் வந்ததில்லை என்கிற குறையை போக்கும் விதமாக இந்த வார ஆனந்த விகடனில் அற்புதமான ஒரு பேட்டி வந்துள்ளது. பேட்டியை சிறப்பாக, பொறுமையாக முடித்த நண்பர்கள் தமிழ் மகன், திரு சமஸ் மற்றும் புகைப்பட கலைஞர்களுக்கு தமிழ் காமிக்ஸ் உலகின் சார்பில் வாழ்த்துக்கள்.

Anandha Vikatan Tamil Weekly Issue Dated 20062012 Page No 64-65-66 Vandumama Interview

கடந்த இரண்டு வருடங்களாகவே அமர் சித்திரக் கதைகள் ஒரு புதுப்பொலிவுடன் வருவதை கண்கூடாக காண முடிந்தது. அதன் ஒரு தொடர்ச்சியாகவே இப்போது தஞ்சாவூரை பற்றிய இந்த காமிக்ஸ் புத்தகம். புதிய பாணி சித்திர வகையுடன் வந்துள்ள இந்த புத்தகத்தை காமிக்ஸ் ரசிகர்கள் கண்டிப்பாக படித்தே ஆக வேண்டும்.

 

India Today Dated 13062012 Page No 51 Kadhambam Section ACK Latest Issue News

வாண்டுமாமாவிற்க்கே இந்த நிலை என்றால், மற்றவர்களை பற்றி சொல்லவே வேண்டாம். ஆனால் அந்த குறையை போக்கும் விதமாக ஓவியர் மாயா அவர்களின் அற்புதமான நேர்காணல் ஒன்றினை சூரியகதிர் பத்திரிக்கையில் தொகுத்து வெளியிட்டு இருந்தனர். பேட்டி எடுத்த நண்பர் திரு ஸ்ரீஹரி அவர்களுக்கும், பத்திரிக்கையாளர் திரு பாரதி ராஜா அவர்களுக்கும் நன்றிகள் பல.

 

Artist Maya Interview in SuryaKathir April 2012 Page No 50 - 51 - 52

ஒரு மாறுதலுக்காக எவர் கிரீன் ஸ்டார் திரு செல்லம் அவர்களின் கை வண்ணத்தில் எண்பதுகளில் குங்குமம் இதழில் வந்த ஒரு சில நகைச்சுவை துணுக்குகள்.

 

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய  கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.

15 வாண்டுமாமா பிறந்த நாள் சிறப்பு பதிவு 01: தேச தேசக் கதைகள்

காமிரேட்ஸ்,

இந்த மாதம் 21ஆம் தேதி நம்முடைய அன்பிற்குரிய சிறுவர் இலக்கிய எழுத்தாளர் திரு வாண்டுமாமா அவர்களின் பிறந்த நாள் வருகின்றது. அதனை கொண்டாடும் வகையில் இன்றுமுதல் தமிழ் காமிக்ஸ் உலகம் தளத்தில் அவருடைய (இதுவரை இங்கே விமர்சனம் எழுதாத) பத்து சிறந்த புத்தகங்களை பற்றிய பதிவுகள் இடம்பெறும். இவை எந்தவிதமான ஒரு வரிசைக்கிரமத்திலும் இல்லாமல் எனக்கு பிடித்த பத்து புத்தகங்கள் என்றே வரிசைப்படுத்தப்படும். இவற்றில் சில இன்னும் விற்பனைக்கு கிடைக்கலாம், சில கிடைக்காமல் போகலாம்.

என்னால் முடிந்தவரை தற்போதைக்கு விற்பனைக்கு கிடைக்கும் புத்தகங்களை மட்டுமே எழுத முயல்கிறேன் (ஆனால் இந்த புத்தகம் மட்டும் ஒரு சிறப்பிற்குரிய ஒன்று என்பதால் இது இப்போதைக்கு விற்பனையில் இல்லை). அப்போதுதான் இந்த பதிவினை படிக்கும் வாசகர்கள் அந்த புத்தகங்களை மீண்டும் வாங்க எதுவாக இருக்கும். என்ன வாசகர்களே,சாகசங்களும், விந்தைகளும் நிறைந்த ஒரு நாஸ்டால்ஜியா பயணத்திற்கு நீங்கள் தயாரா?

தேச தேசக் கதைகள் ஒரு சிறிய முன்குறிப்பு:

தற்போதைய இன்டர்நெட் உலகில் அனைத்தையுமே கூகிளாண்டவர் துணையுடன் கண்டறிய முடியும். இங்கிலாந்தில் ஜனவரி மாத மாலையில் ஒரு இசை நிகழ்ச்சியை நடத்த நாங்கள் இந்த வாரம் முழுவதும் திட்டமிட்டுக்கொண்டு இருந்தோம். திடீரென்று அப்போது அங்கே பனிமூட்டம் அதிகமாக இருக்குமோ என்று சந்தேகப்பட்டு ஒரு கூகுள் தேடுதலை நிகழ்த்தினால்.அங்கே ஜனவரியில் சாயந்திரம் ஆறு மணிக்கெல்லாம் உணவு விடுதிகளை தவிர மற்ற கடைகள் எல்லாமுமே மூடப்பட்டுவிடும் என்ற விஷயம் தெரிய வந்தது. இந்த விஷயம் சுமார் இருபது ஆண்டுகளுக்கு முன்பு என்றால் இதற்காக இரண்டு மூன்று பேருக்கு போன் செய்து (அதாவது ட்ரன்க் கால் புக் செய்து) கேட்டுக்கொள்ள வேண்டியிருக்கும். அப்போதுகூட போதுமான அளவுக்கு தகவல் இராது. ஆனால் தகவல் தொழில்நுட்பம் இவ்வளவாக முன்னேறியிராத அந்த கால கட்டத்தில் உலகில் இருக்கும் மற்ற நாடுகளைப்பற்றிஎல்லாம் மதியத்தர வர்க்கத்தினருக்கு ஒரு மூடுபனி போலவே அறிந்தும் அறியாமலும் விஷயங்கள் தெரிந்திருக்கும். அதிலும் பள்ளி மாணவர்களுக்கு சொல்லவே வேண்டாம்.

இத்தகைய சூழலில், உலகின் மற்ற நாடுகளைப்பற்றியும் அங்கிருக்கும் கலாச்சாரங்களையும் தெரிந்து கொள்வதர்க்கு பள்ளி புத்தகங்களை விட போரடிக்கும் விஷயங்கள் வேறு இருக்காது. ஆனால் அதே விஷயங்களை அலுக்கவே அலுக்காமல் இன்னும் கொஞ்சம் இருக்காதா என்று ஏங்கும் அளவிற்கு சொல்லும் மந்திர விதையை தெரிந்தவர் திரு வாண்டு மாமா அவர்கள். உலக நாடுகளைப்பற்றியும், அங்கிருக்கும் நாட்டுபுற கதைகளை  பற்றியும் இவர் எழுதிய தேச தேசக்கதைகள் வரிசைதொடர் மிகவும் பிரபலமானது. இந்த வரிசையில் மொத்தம் 56 நாட்டுப்புர கதைகளை எழுதியுள்ளார் திரு வாண்டு மாமா அவர்கள். அந்த கதைகளைப் பற்றியும், எவ்வாறு 56 கதைகள் உருவானது என்பதைப் பற்றியும் அவரே எழுதக் கேட்போம் படிப்போம்.

சிறுவர்களுக்கான ஆண்டாக அறிவிக்கப்பட்ட 1979 - 80ஆம் ஆண்டில் இந்த கதைகள் தொகுக்கப்பட்டு மெக்மிலன் (இந்தியா) நிறுவனத்தால் வெளியிடப்பட்டன. இந்த நிறுவனம் வெளியிட்ட வாண்டுமாமா புத்தக வரிசை இது ஒன்றாகத்தானிருக்க வேண்டும். மெக்மிலன் சிறுவர் வெளியீடுகள் ஆங்கிலத்தில் வெளியிட நாம் படித்திருக்கிறோம். ஆனால் தமிழில், அதுவும் வாண்டுமாமா அவர்கள் கைவரிசையில் இதுவே முதல் முறையாக இருக்க வேண்டும்.

McMilan Publications Desa Desa Kadhaigal 3 By Vaandumama Cover Front	McMilan Publications Desa Desa Kadhaigal 3 By Vaandumama Cover Back	McMilan Publications Desa Desa Kadhaigal 3 By Vaandumama Title Page

ஓவியர் திலகம் மாருதி அவர்களின் கைவண்ணத்தில் அற்புதமான வண்ணக் கலவையுடன் வந்திருக்கும் இந்த அட்டைப்படங்களுக்காகவே இந்த புத்தகத்தை வாங்கலாம். பின்னர் இதே சித்திரங்கள் வாண்டுமாமா அவர்களின் பிறிதொரு புத்தகத்திற்கு உபயோகப்படுத்தப்பட்டன என்பது வேறொரு விஷயம்.

ஒவ்வொரு கதையும் ஆரம்பிக்கும்போது அந்த நாட்டைப்பற்றி ஒரு பக்க குறிப்புடனே ஆரம்பிக்கிறது. மேலும் அந்த நாட்டின் விவரப்படம் (மேப்) இல்லாமலே அந்த நாட்டின் புவியியலை புரிந்துகொள்ள உதவுகிறது. இந்த புத்தகத்தின் முதல் கதை இங்கிலாந்து நாட்டினைப்பற்றியது.

McMilan Publications Desa Desa Kadhaigal 3 By Vaandumama Index Page	McMilan Publications Desa Desa Kadhaigal 3 By Vaandumama Story 1 Intro Page

இந்த கதைகளின் சிறப்பைத் தெரிந்து கொள்ள முதல் கதையை மட்டும் முழுமையாக பிரசுரிக்கிறேன். மற்ற கதைகளை படிக்க வேண்டுமெனி தேடிப்பிடித்து இந்த புத்தகத்தை வாங்க முயலுங்கள் (இல்லை எனில் என்னைப்போலவே ஒரு இணைய தளத்தை ஆரம்பியுங்கள், தஞ்சாவூருக்கு அருகில் இருந்து ஒரு வாசகர் இந்த புத்தகத்தை உங்களுக்கு பரிசாக அளிப்பார்).

McMilan Publications Desa Desa Kadhaigal 3 By Vaandumama Story 1

அற்புதமான இந்த கதையை படித்ததும் மற்ற கதைகளை படிக்க ஆவலாக இருக்கிறதா? உங்கள் தேடலை உடனே துவங்குங்கள். இல்லையெனில் மற்ற வாண்டுமாமா கதைகளைப்பற்றி படிக்க காத்திருங்கள். அடுத்த பதிவில் இப்போது விற்பனைக்கு கிடைக்கும் ஒரு வாண்டுமாமா எழுதிய துப்பறியும் நாவலைப்பற்றி எழுதுகிறேன். மூன்று நாட்கள் பொறுத்திருங்கள்.

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய  கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.