11 Comic Cuts 46-News 46: காமிக்கான் எக்ஸ்ப்ரெஸ்,பேட்மேன் செய்திகள்,அனிமேஷன் கார்ட்டூன் படமாக கோகுலத்தில் கண்ணன் மற்றும் 50வது ஆண்டில் அமுல் கார்ட்டூன்கள்

டியர் காமிரேட்ஸ்,

அனைவருக்கும் வணக்கம். மின்சார பஞ்சம், மின் தடை என்றெல்லாம் தமிழ் நாடே கடந்த இரண்டு ஆண்டுகளாக புலம்பிக் கொண்டிருக்க,நம் தலை நகரில் ஒரு ரியாக்ஷனுமே இல்லையே என்று பலரும் கடுப்பில் இருந்தனர். "தலைவலியும், காய்ச்சலும், கரண்ட் கட்டும் தனக்கு வந்தால் தான் தெரியும்" என்றுகூட சொல்ல ஆரம்பித்தார்கள். அதன் விளைவா இல்லையா என்பது தெரியாது. ஆனால் திங்கள்கிழமை காலையிலும், இன்று மதியம் வரையிலும் இங்கு தில்லியில் முழு மின்சார ப்ரேக். எந்த அளவுக்கு என்றால்,மெட்ரோ ரெயில்கள் கூட தடை பட்டன. அப்படிப்பட்ட ஒரு சூழலில் தான் இந்த பதிவு வலை ஏற்றப்படுகிறது.

காமிக்கான் எக்ஸ்ப்ரெஸ்: கடந்த ஞாயிறன்று எடிட்டரின் வலைதளத்தில் இந்த செய்தி வந்தவுடன் பலரும் மகிழ்ச்சியடைந்தனர். இது ஒரு நல்ல ஆரம்பம் என்றும், இதன் தாக்கம் மற்றும் விளைவுகள் ஏற்படுத்தப்போகும் மாற்றங்களை காண இப்போதே நம்மை தயாராக்கிக் கொள்ளுங்கள் தோழர்களே. இங்கே எடிட்டர் கூறியதை மறுபடியும் பதிக்கிறேன்:

“செப்டம்பர் 8 & 9 தேதிகளில் பெங்களூரில் COMIC CON 2012 என்றதொரு காமிக்ஸ் திருவிழாவினை நடத்திட டெல்லியில் தலைமையகம் கொண்டிட்டதொரு நிறுவனம் செயல்பட்டு வருகின்றது! ஏற்கனவே டெல்லியிலும். மும்பையிலும் இது போல் ப்ரேத்யேக shows நடத்தி வெற்றி கண்டுள்ளார்கள்! இம்முறை பெங்களூரில் நடநதேறிடவிருக்கும் இந்தத் திருவிழாவில் நாமும் பங்கேற்கிறோம்! நமது லயன் - முத்து காமிக்ஸின் ஸ்டால் அங்கே இருந்திடும்! உங்களை அங்கு வரவேற்பது எனது கடமையும் ; பெருமையும்! Hope to see you there guys!”.

ஆகையால் தோழர்களே, செப்டெம்பர் இரண்டாம் வாரத்தில் நம்முடைய தாரக மந்திரம் "சலோ,சலோ -பெங்களூரு சலோ" என்பதாகவே இருக்கட்டும். என்னைப் பொறுத்தவரையில் 5 Weeks is Too far to plan ahead right Now. பார்க்கலாம். பயணமும், பணியும் தடையாக வராத வரையில் கண்டிப்பாக ஸ்டாலில் வருகை புரிவேன். அந்த காமிக்கான் எக்ஸ்ப்ரெஸ் பற்றிய ஒரு துணுக்கு செய்தி கடந்த வார டெக்கான் க்ரோனிக்கள் தினசரியில்.

 

Deccan Chronicle Chennai Edition Chennai Chronicle Dated Sunday 22nd July 2012 Page No 22 ComiCon Express Bangaluru News

பேட்மேன் செய்திகள் -  சூப்பர் ஹீரோக்களின் சாபம்: பேட்மேன் திரைப்பட துவக்க நாளில் நடந்த துக்க சம்பவம் பற்றி நண்பர்களிடம் பேசிக்கொண்டு இருந்தபோது இப்படி ஒரு ஆர்டிக்கிள் கண்டிப்பாக வருமென்று எதிர்ப்பார்த்தோம். ஆனால் எதிர்பார்த்ததற்கு மாறாக இந்த செய்தி டெக்கான் க்ரோனிக்கள் பத்திரிக்கையில் வராமல் டைம்ஸ் ஆப் இந்தியாவில் சென்னை டைம்ஸ் முதல் பக்க செய்தியாக வந்தது.

 

The Times Of India Chennai Edition Chennai Times Page 01 Dated Monday 23rd July 2012 Curse of the Super Heroes Article

பேட்மேன் செய்திகள் -அடுத்த சூப்பர் ஹீரோ படம்?: பேட்மேன் ட்ரைலஜியின் மூன்றாம் பாகமும் முடிந்து விட்டதால் அடுத்த காமிக்ஸ் சூப்பர் ஹீரோவை தேடும் படலம் பற்றிய செய்தியாக இருந்தாலும் சந்தடி சாக்கில் லந்து கொடுக்கும் வகையாக ரசிகர்களுக்கு ஆடோகிராஃப் போட்டு விட்டு கைகளை ஜெல் போட்டு கழுவிய ஹீரோ பற்றி செய்தி போட்டு கொளுத்தி விட்டு விட்டதுதான் இந்த எடிட்டரின் ஸ்பெஷாலிடி.

 

Times Of India Chennai Edition Dated Sunday 22nd July 2012 Page No 13 Hunt for Next Super Hero after Batman

பேட்மேன் செய்திகள் -சிறுவர்களின் உணவுப் பழக்கமும்: நம்ம ஊரில் சினிமா நட்சத்திரங்களை கொண்டு இரத்த தானம், போலியோ ஊசி போட்டுக்கொள்வது போன்ற சமூக நலச் செய்திகளை பாமர மக்களுக்கு கொண்டு செல்கிறோம்.அதுபோலவே ஜன்க் ஃபுட் எனப்படும் உணவு வகைகளின் கெடுதலையும், சரியான உணவுப் பழக்கத்தை ஏற்படுத்தவும் சூப்பர் ஹீரோக்களை பயன்படுத்துவது பற்றிய செய்தி இது:

 

The Times Of India Chennai Edition Page 13 Dated Tuesday 24th July 2012 The Healthy Knight Rises Article

பேட்மேன் செய்திகள் - மாட்டிக்கொண்டார் போலி பேட்மேன்: பிரேசில் நாட்டில் ஒரு உணவகத்தில் பேட்மேன் போல உடையணிந்துக்கொண்டு திருட முயன்ற வாலிபரை கைது செய்துள்ளனர். இதற்க்கு மேலே என்ன சொல்வது? வேறு ஏதாவது என்றால் கூட Better Luck Next Time என்று சொல்லலாம், இங்கே? ஹ்ம்ம் ஒன்றுமே இல்லை. 

 

The Times of India Chennai Edition Page 13 Dated Sunday 29th July 2012 Dark Knight Falls News

கோகுலத்தில் கண்ணன் - அனிமேஷன் கார்ட்டூன் படம் - தமிழில்: ரிலையன்ஸ் நிறுவனம் கார்ட்டூன் / அனிமேஷன் படங்களுக்கு முன்னுரிமை அளிக்கும் என்பது நாமெல்லாம் அறிந்ததே (அட்லீஸ்ட் எனக்காவது தெரியும்). அவர்களின் தயாரிப்பில் இந்த வாரம் வெள்ளிகிழமை அன்று வரவிருக்கும் ஒரு படத்தை பற்றிய செய்திகள் இங்கே. படித்து தெரிந்து கொள்ளுங்கள், என்னுடைய பழைய நிறுவனத்தை பற்றி அதிகமாக சொல்வதற்கில்லை.

 

The Hindu Chennai Edition Metro Plus Page No 01 Dated Wednesday 25th July 2012 Gokulathil Kannan Article

அமுல் நிறுவனத்தையும், அதனுடைய ட்ரேட்மார்க் கார்ட்டூன் பற்றியும் தெரியாதவர்கள் இந்தியாவில் குறைவானவர்களே இருப்பார்கள். அவர்களுக்கு சென்ற மாதம் ஒரு சிறப்பான மாதமாகும். ஆமாம், அமுல் பேபியின் கார்ட்டூன் வர ஆரம்பித்து ஐம்பது ஆண்டுகளை நிறைவடைந்ததையொட்டி சிறப்பான கொண்டாட்டங்களை ஒழுங்கு செய்தார்கள். அதனைப்பற்றிய ஒரு செய்தி தொகுப்பு. மிகவும் அருமையாக, ஒரு கார்ட்டன் ரசிகரால் எழுதப்பட்ட கட்டுரை இது, ஆகையால் க்ளிக் செய்து முழுமையாக படித்து மகிழுங்கள்.

 

The Hindu Chennai Edition Metro Plus Page 01 Dated Sunday 29th July 2012 Amul Spoof 50 Years Article

இன்னும் இரண்டு நாட்களில் நியூ லுக் ஸ்பெஷல் இதழின் சிறப்பு விமர்சனப் பதிவு ஒன்று வரும்.

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய  கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.

10 #RIP விடியல் பதிப்பகம் தோழர் சிவா - ஒரு காமிரேட்டின் இறுதி அஞ்சலி

காமிரேட்ஸ்,

இன்று மதியம் உணவு உண்ண ஆரம்பிக்கும்போது ஒரு தொலைபேசி அழைப்பு. ஓரிரு முறை மட்டுமே பேசியுள்ள அந்த நண்பர் அழைக்கும்போதே ஏதோ முக்கியமான விஷயம் என்று தெரிந்து கொண்டேன். ஒரே வாக்கியத்தில் முடித்து விட்டார் "விடியல் பதிப்பக தோழர் சிவா இஸ் நோ மோர்" என்பதே அந்த தகவல். வார்த்தைகளால் விவரிக்க இயலவில்லை என்றாலும் கூட முயற்சிக்கிறேன்: வெய்யில் தகிக்கும் ஒரு மதிய நேரத்தில் நிழலில் இளைப்பாற வந்தவனின் தலையில் ஒரு பெரிய ஐஸ் கட்டியை எடுத்து வைத்தால் எவ்வளவு வலிக்குமோ, அவ்வளவு வலி (More of a pain in the Mind, than in the Body). இத்தனைக்கும் சிவா சாருக்கும் எனக்கும் அந்த அளவுக்கு பழக்கம் கூட கிடையாது. ஒரு எட்டு அல்லது பத்து முறை சந்தித்தது இருக்கிறேன், அவ்வளவுதான். ஆனால் ஒவ்வொரு சந்திப்புமே சிறு வயதில் பள்ளி விடுமுறை நாட்களில் சாப்பிட்ட நாவல்பழத்தின் சுவை எப்படி இன்றும் நாவில் தங்கி இருக்கிறதோ, அப்படி நினைவில் தங்கி இருக்கிறது, Such was his Presence.

விடியல் பதிப்பகம் - ஒரு அறிமுகம்: தீவிர வாசிப்பிற்கும் எனக்கும் கடந்த எட்டு ஆண்டுகளாகவே ஏழாம் பொருத்தம். ஆகையால் அந்த தளத்தில் என்ன நடக்கிறது என்பதை பிறர் சொல்லி தெரிந்து கொள்வேனே ஒழிய நேரிடை பழக்கம் கிடையாது. தமிழ்க் கடவுள் முருகன் அப்படி "என் நாடு, என் மக்கள், எனக்கென்று ஒரு உலகம்" என்று அமைத்துக் கொண்டாரோ அப்படியே நானும் 2008-ம் ஆண்டு தமிழ் காமிக்ஸ் உலகம் என்றொரு சிறிய இணையதளத்தை துவக்கினேன்.அங்கொன்றும், இங்கொன்றுமாக ஓரிரு பதிவுகளை இட்டுக்கொண்டு இருக்கும்போதுதான் பல காமிரேட்டுகள் அறிமுகம் ஆயினர். பலர் மறக்கவே முடியாத நண்பர்களாகவும், பலர் மறக்க வேண்டிய நபர்களாகவும் மாறி இருக்கும் இந்த சூழலில் ஒரு நாள் காமிரேட் கனவுகளின்காதலன் ஷங்கர் விஸ்வலிங்கம் அவர்களுடன் பேசிக்கொண்டு இருக்கும்போது அவர் ஒரு புத்தகத்தை குறிப்பிட்டு, அந்த புத்தகம் Any-Indian.com என்கிற தளத்தில் விற்பனைக்கு கிடைப்பதாகவும், அது ஒரு தமிழ் மொழிமாற்று ஃகிராபிக் நாவல் என்றும் அறிமுகப்படுத்தினார்.  அப்போது அந்த புத்தகத்தை உடனடியாக வாங்க இயலவில்லை. சுமார் ஆறு மாதங்கள் கழித்து கோவை நகருக்கு சென்றபோது அங்கேதான் அவர் குறிப்பிட்ட அந்த புத்தகங்களை வாங்க முடிந்தது. இவையே அந்த புத்தகங்கள்:

Vidiyal Pathippagam Marjane Satrapi PersiPolis Book 1 in Tamil Published By Siva Sir	Vidiyal Pathippagam Marjane Satrapi PersiPolis Book 2 in Tamil Published By Siva Sir	Vidiyal Pathippagam Marjane Satrapi PersiPolis Intro in the Back Wrapper in Tamil Published By Siva Sir

அதுவரை மர்ஜானே சத்ரபி பற்றி கேள்விப்பட்டு இருந்தும், அந்த படத்தின் டிவிடி இருந்தும், ஆங்கில புத்தகம் கைவசம் இருந்தும் (நன்றி இயக்குனர் மிஷ்கின்) ஏனோ படிக்கவே தோன்றவில்லை. ஆனால் தமிழில் வந்துள்ளது என்பதால் பரிட்சார்த்த முயற்சியாக சில பக்கங்களையாவது படிக்கலாம் என்று நினைத்து பயண களைப்பு ஆளை அசத்தும் ஒரு கோவை இரவில் படிக்க ஆரம்பித்தேன். ஆனால் அந்த கதையின் நேர்த்தி என்னை இரண்டு பாகங்களையும் அதே இரவில் படிக்க தூண்டியது (இந்த கதையின் தமிழாக்கம் குறித்து இப்போதும் எனக்கு மாற்றுக்கருத்தே உண்டு என்பதையும் இங்கே பதிவு செய்ய கடமைப்பட்டுள்ளேன்).

மறுநாள் காலையில் வேறு அலுவலக வேலைகள் இருந்தும், கோவையில் இருக்கும் என்னுடைய நண்பரும், வழிகாட்டியுமான யாழ் நூலக தோழர் துரை அவர்களை சந்தித்து இந்த விடியல் பதிப்பகம் பற்றியும், அதன் பதிப்பாளரைப்பற்றியும் விசாரித்தேன். அவரை சந்திக்க நான் ஆவலாக இருக்கிறேன் என்பதை தெரிந்து கொண்ட துறை அவர்கள் அன்று மாலையே அவரின் வெற்றிக்கு அழைத்து சென்றார். காமிரேட் கோவை பிரகாஷ் அவர்களின் வீட்டிற்கு அருகாமையில் இருந்த அவரின் வீட்டிற்கு சென்றது ஒரு அற்புதமான விஷயம்.

Vidiyal Pathippagam Siva Sir With Yazh Noolagam Durai Sir in Siva Sir's Home in Coimbatore

பெ. சிவஞானம் என்று மற்றவர்களாலும், தோழர் என்று உரிமையோடு சக காம்ரேட்டுகளாலும், சிவா என்று வெகு சிலாராலும் அழைக்கப்பட அந்த எளிமையான மனிதரைப்பற்றி அன்றுதான் முழுமையாக தெரிந்து கொண்டேன். காமிக்ஸ் மற்றும் சித்திரக் கதைகள் மேலுள்ள என் காதலால் கவரப்பட்டு அவரது கனவு ப்ராஜெக்ட் பற்றி சொல்ல ஆரம்பித்தார்.

விடியல் பதிப்பகம் சிவா சாரின் கனவு: ஜப்பானிய மாங்கா பற்றி நிறைய பேர் அறிந்து இருப்பீர்கள். நம்ம ஊரில் காமிக்ஸ் / சித்திரக் கதை என்று எப்படி நாம் பெயரிட்டு அழைப்பதைப்போல ஜப்பானில் சித்திரக் கதைகளை மாங்கா என்று அழைப்பார்கள். எழுத்தாளர் எஸ். ரா ஒருமுறை அவரது தளத்தில் ஒசாமு தெசுகா பற்றி குறிப்பிட்டு இருப்பார். அந்த அற்புதமான படைப்பாளியின் மாஸ்டர் பீஸ் என்று பலராலும் கருதப்படும் புத்தரின் கதையாகிய புத்தாவை தமிழில் வெளியிடுவதுதான் சிவா சாரின் கனவு. தன்னுடைய ஆசையை தெசுகாவின் எஸ்டேட்டிற்கு தெரிவித்து, முறையாக அதன் உரிமையையும் பெற்றார்.

ஒரு மழைக்கால மாலை நேரப் பொழுதில் சிவா சாரின் வீட்டில் இந்த மாங்காவை தமிழில் எப்படி கொண்டு வருவது என்று சிவா சார், துறை சார், பயங்கரவாதி டாக்டர் செவன் மற்றும் அடியேனும் விவாதித்தோம். ஏற்கனவே மர்ஜானே சத்ரபியின் புத்தகங்களை தமிழில் வெளியிட்டு பண அளவிலும், மன அளவிலும் நொந்து இருந்த சிவா சாரிடம் இந்த தொகுப்புகளை தமிழில் வெளியிட்டால் ஆகும் செலவையும்,அதற்க்கான சந்தையாக்கத்தையும் பற்றி பல மணி நேரங்கள் பேசினோம். பின்னர் புத்தரை தமிழில் பதிப்பிக்க இது உகந்த நேரமல்ல என்று முடிவெடுத்து,அதன் படி இந்த கனவு ப்ராஜெக்டை தற்காலமாக தள்ளி வைத்தோம் (INR 3500 is the Cost per set). அதன் பின்னர் வேறு சில தமிழ் காமிக்ஸ் குறித்த விஷயங்களையும் மற்ற பதிப்பக விஷயங்களையும் கலந்து பேச சிவா சார் எப்போதுமே தயங்கியதில்லை.

 

Vidiyal Pathippagam Siva Sir With His PersePolis Books in Tamil Language in His Home in Coimbatore

சென்ற ஆண்டு சென்னை புத்தக கண்காட்சியின்போது கிழக்கு பதிப்பகம் பத்ரியிடம் கூட இந்த ப்ராஜெக்டை பற்றி பேசிக்கொண்டு இருந்தோம். இந்த ஆண்டு உடல்நிலை சரியில்லை என்று சிவா சார் புத்தக கண்காட்சிக்கு ஓய்வு கொடுத்தார். சமீபத்தில் தெசுகாவின் அதி தீவிர வாசகர் இயக்குனர் மிஷ்கின் அவர்களிடம் இந்த ப்ராஜெக்டை கூறியவுடன், அவரும் முகமூடி படம் முடிந்தவுடன் இதைப்பற்றி பேசுவோம், குறைந்த பட்சம் ஒரு லிமிடெட் எடிஷன் அளவிற்காவது கொண்டு வருவது என்றெல்லாம் ஆலோசித்தோம். பின்னர் மார்ச் மாதம் கூட அவரிடம் தொலைபேசியில் பேசிக்கொண்டு இருக்கும்போது இந்த விஷயத்தை கூறியவுடன் நுரையீரல் புற்று நோயால் தாக்கப்பட்டு, மரணத்துடன் போராடி வரும் நிலையிலும் உற்சாகத்துடனே பேசினார்.

ஒவ்வொரு முறை கோவை செல்லும்போதெல்லாம் அவரை சந்திப்பதையோ / அவருடன் பேசுவதையோ வழக்கமாக கொண்ட நான், கடந்த இரண்டு தடவையும் நேரமின்மை மற்றும் பணிச்சுமை காரணமாக சந்திக்க முடியாமல் திரும்பி விட்டேன். துரை சாரின் மகன் திருமண நேரத்தில்கூட சிவா சாரைப்பற்றி விசாரிக்கையில் நுரையீரல் புற்று நோய்க்கு கீமோதெரபி சிகிச்சை பெற்றுவருவதை தெரிந்துக்கொண்டேன். உடல்நலம் கவலைக்கிடமாக இருந்தவேளையில் ஒருமுறை அவரிடம் தொலைபேசியில் பேசும்போதுகூட தெளிவாகவும், அன்புடனுமே பேசினார். என்ன இருமல் தான் அவரை அதிகம் பேசவிடாமல் தடுத்தது. ஆனால் அந்த உரையாடல்தான் எங்களின் கடைசி உரையாடல் என்றோ அல்லது அவரை நான் அதற்க்கு பிறகு சந்திக்கவே முடியாது என்பதோ அப்போது எனக்கு தெரியாது.

நுரையீரல் புற்று நோயால் தாக்கப்பட்டு, கீமோதெரபி சிகிச்சை பெற்றுவந்த சிவா சார் கோவை ராமகிருஷ்ணா மருத்துவமனையில் கடந்த ஒரு வாரமாக சற்றே கவலைக்கிடமான நிலையிலேயே இருந்தார். திரவ உணவையே உட்கொண்டு வந்த அவருக்கு, கடந்த ஒரு வாரமாக அந்த திரவ உணவே அவரது வயிற்றில் திடமாக மாறி பிரச்சினைக்கு ஆளானார். அப்போதுகூட இப்படி ஒரு முடிவு வருமென்று தோணவில்லை.

தனிப்பட்ட முறையிலோ, அவரது தீவிர இலக்கிய, வாசக முறையிலோ பழக்கப்படாத அவர் பல வகையில் என்னை கவர்ந்தவர். இதுவரையில் யாரின் மறைவுக்கும் இறுதி அஞ்சலி செலுத்த செல்லாத எனக்கு இவரின் இறுதி அஞ்சலிக்கு செல்ல ஆசைப்பட்டாலும், அலுவலக பணி நிமித்தம் காரணமாக மும்பை செல்லவிருப்பதால் அந்த எண்ணம் ஈடேறவில்லை.

ஆனால் வரும்  ஞாயிற்றுக்கிழமை அன்று யாழ் நூலகம் திரு  துரை அவர்களால் ஒரு இரங்கல் கூட்டம் ஒழுங்கு செய்யப்படுவதாக தகவல். கண்டிப்பாக அதற்காகவேனும் கோவை செல்ல முடிவெடுத்துள்ளேன். மேற்கொண்டு விவரங்களை இரங்கல் கூட்டம் ஊர்ஜிதம் ஆனவுடன் இங்கு பின்னூட்டத்தில் தெரிவிக்கிறேன்.

சிவா சார், கண்டிப்பாக ஒரு நாள் உங்களின் புத்தர் கனவு நிறைவேறும் நான் நிறைவேற்றுவேன். இது உறுதி. Till then, Rest in Peace.

25 மாய மூன் காமிக்ஸ் - சென்னையிலிருந்து வெளிவந்த ஆங்கில வெஸ்டர்ன் காமிக்ஸ் - Wild West Series From Chennai – Maya Moon Comics

டியர் காமிரேட்ஸ்,
இந்த பதிவு நம்முடைய வழமையான பதிவுகளில் இருந்து சற்றே மாறுபடுகின்ற ஒன்று. ஆமாம், இது ஒரு என்குயரி பதிவு. முன்பே சொன்ன மாதிரி தமிழ் காமிக்ஸ் பற்றிய ஒரு ஆவணப்படம் ஒன்றினை தயாரிக்கும் முயற்சியில் நான் ஈடுபட்டுள்ளேன். அதற்காக தமிழில் வெளிவந்த அனைத்து (கிட்டத்தட்ட) வகையான காமிக்ஸ் புத்தகங்களையும் சேகரிக்கும் முயற்சியில் ஈடுபட்டுள்ளேன். உதாரணமாக மலர் காமிக்ஸ் என்று ஒரு காமிக்ஸ், அதில் (அட்லீஸ்ட்) ஒரே ஒரு மாதிரி இதழாவது சேகரித்து அந்த காமிக்ஸ் பற்றியும், அந்த பதிப்பாளரைப் பற்றிய கூடுதல் விவரங்களை சேகரித்து அதனை தொகுத்து ஆவணப்படுத்துதலே என் நோக்கம்.

ஆகையால் உங்களுக்கு தெரிந்த தமிழில் வெளிவந்த வித்தியாசமான காமிக்ஸ் புத்தகங்கள் உங்களிடம் இருந்தால் (A) அதனை எனக்கு விற்பனை செய்யலாம் அல்லது (B) அந்த புத்தகத்தின் முன் அட்டை, பின் அட்டை, முதல் பக்கம், கடைசி பக்கம் என்று சில பக்கங்களை எனக்கு ஸ்கான் / போட்டோ அனுப்பலாம். சரி, சொந்தக் கதை சோகக் கதையை ஓரம் கட்டி விட்டு வந்த விஷயத்தை கவனிப்போம். அதாவது மாய மூன் காமிக்ஸ். எஸ், தமிழ் நாட்டில் இருந்து வெளிவந்த வெஸ்டர்ன் காமிக்ஸ்.

இந்த புத்தகத்தினைப் பற்றி தெரிந்து கொள்ள நாமெல்லாம் இப்போது ஒரு சிறிய ஃப்ளாஷ்பேக்கில் செல்வது மிக அவசியம். இந்த விஷயம் நடந்து சுமார் நான்கு ஆண்டுகள் ஆகிறது. சென்னையின் ஒரு வெயில்கால மாலை நேரத்தில் ஒரு புத்தக கடையில் இந்த புத்தகம் எனக்கு கிடைத்தது. வழக்கமான ஒரு மொக்கை காமிக்ஸ் தானே என்று புரட்டினால், உள்ளே இருந்ததோ நம்மூர் தயாரிப்பு. ஆனால் அதை எல்லாம் விட என்னை மிகவும் கவர்ந்தது இந்த காமிக்ஸ் புத்தக வரிசையின் லோகோ. அச்சு அசலில் அப்படியே நம்ம முத்து மினி காமிக்ஸ் லோகோ போலவே இருந்தது குறிப்பிட தக்க விஷயம்.

 

Maya Moon MM Comics English Western Comics Created in Chennai Operation Bingo Brothers Cover	Maya Moon MM Comics English Western Comics Created in Chennai Operation Bingo Brothers Page 01 Intro

புத்தகம் பைண்டிங் செய்யப்பட்ட நிலையில் இருப்பதால் அட்டை சிதிலமடைந்து காணப்படுகிறது. ஏதோ, எனக்கு தெரிந்த போட்டோஷாப்பில் இந்த அட்டைப் படத்தையும், சில பக்கங்களையும் ஒப்பேற்றி இருக்கிறேன். நண்பர்களே, இந்த காமிக்ஸ் புத்தகங்கள் இப்போதைக்கு பார்க்க காமெடியாகவும், கிண்டலாகவும் தெரிந்தாலும்கூட இவை எனக்கு மிகவும் அவசியம். ஆகையால் உங்களிடம் இது போன்ற வித்யாசமான புத்தகங்கள் இருந்தால் அவற்றை டிஸ்போஸ் செய்யவும்.

Maya Moon MM Comics English Western Comics Flash Page 2 and 3

இந்த புத்தகம் நமக்கெல்லாம் பரிச்சயமான ஃப்ளீட்வே நிறுவன வெஸ்டர்ன் காமிக்ஸ் இதழ்களைப்போலவே அறுபத்தி நான்கு பக்கங்கள் கொண்டதாக இருந்தது. ஒரு பக்கத்திற்கு இரண்டு கட்டங்கள் என்று ஸ்டாண்டர்ட் ஆக இருந்தது. இந்த ஆங்கில வெஸ்டர்ன் காமிக்ஸ் புத்தகத்தின் வசனங்கள் (இன்றைய சூழலில்) சிரிப்பூட்டுவதாகவே அமைந்துள்ளது. ஆனால் இந்த புத்தகம் வெளிவந்த போது அதன் வரவேற்ப்பு எப்படி இருந்தது என்பதை கண்டறிய ஆசை.

 

Maya Moon MM Comics English Western Comics Created in Chennai Operation Bingo Brothers Cover 2

அநேகமாக இந்த புத்தகம் எண்பதுகளில் வந்திருக்க வேண்டும்.அப்போதுதான் ஒரு ரூபாய்க்கு அறுபத்தி நான்கு பக்கங்கள் கட்டுபடியாகி இருக்கும். எண்பதுகளின் மத்தியத்தில் எல்லாம் புத்தக விலை ஒன்றரை ரூபாய்க்கும், இரண்டு ரூபாய்க்கும் மாறி விட்டது.

அட்டை மற்றும் படங்களை வரைந்த ஓவியரின் கிரெடிட் எங்கேயும் இல்லை. பதிப்பகத்தாரின் முகவரியை வைத்து கணிக்கும்போது அநேகமாக விமல் காமிக்ஸ் கதைகளுக்கு வரைந்த ஓவியரே இவராகவும் இருக்கக்கூடும் என்று நினைக்கிறேன். அவர்களிடம் ஒருமுறை பேசி இருக்கிறேன். அந்த பேட்டியின் விவரங்களை மறுபடியும் சரி பார்த்தால் இதனை ஊர்ஜிதப்படுத்த இயலும் என்றே நினைக்கிறேன். தற்சமயம் வெளியூரில் இருப்பதால் உடனடியாக தகவலை சரி பார்க்க முடியவில்லை.

ஓவியர் ராணு அவர்கள் எண்பதுகளின் முடிவில் தொண்ணூறுகளின் ஆரம்பத்தில் குட்டி & குண்டு காமிக்ஸ் என்று ஒரு சிறுவர் இதழை துவக்கினார். நான்கு ருபாய் விலையில், கருப்பு வெள்ளையிலும், இரு வண்ணங்களிலும் சுமார் முப்பது இதழ்கள் வரை வெளிவந்த அந்த புத்தகம் முழுக்க முழுக்க ஆங்கிலத்திலேயே இருந்தது குறிப்பிடத்தக்கது.

சிறு சிறு சித்திரக் கதைகளையும், பல எழுத்துக் கதைகளையும், துணுக்குகளையும் உள்ளடக்கிய அந்த இதழ், சரிவர விற்பனையில் சோபிக்கவில்லை என்பதே உண்மை. சிற்சில விளம்பரங்களையும், தன்னுடைய சொந்தக் காசையும் நம்பியே ஓவியர் ராணு அவர்கள் அந்த இதழை துவக்கினார் என்பது குறிப்பிடத் தக்கது.

தமிழ் நாட்டில் இருந்து இதுபோல ஆங்கில மொழியில் காமிக்ஸ் அல்லது சிறுவர் இலக்கிய புத்தகங்கள் வந்து இருந்தால் அதனை பற்றி மேலதிக தகவல்களை தெரிந்து கொள்ள ஆவல்.

வாசக அன்பர்களுக்கு ஒரு வேண்டுகோள்: தமிழில் சுமார் நூற்றி அறுபதிற்கும் மேற்பட்ட காமிக்ஸ் புத்தகங்கள் வந்துள்ளன. கடந்த ஐந்து ஆண்டுகளாக கடின முயற்சியில் சேகரிக்க முடிந்த தகவல்கள் இவை. இவற்றில் என்னிடம் பாதிக்கும் மேற்ப்பட்ட புத்தகங்கள் இல்லை. ஆகையால் இந்த மாதிரியான புத்தகங்கள் உங்களிடம் இருந்தாலோ, அல்லது உங்களுக்கு தெரிந்தவர்களிடம் இருந்தாலோ தயவு செய்து தகவல் அளிக்கவும். அவற்றை வாங்கவோ அல்லது ஸ்கான் / போட்டோ எடுக்கவோ அனுமதி தேவை.

இன்னும் இரண்டு நாட்களில் நியூ லுக் ஸ்பெஷல் இதழின் சிறப்பு விமர்சனப் பதிவு ஒன்று வரும்.

இப்போதைக்கு இவ்வளவுதான் காமிரேட்ஸ். வழக்கம் போல உங்களுடைய  கருத்துக்களை, கமெண்ட்டுகளை பதிவு செய்திடுங்கள். தமிழில் டைப் செய்ய விரும்புவர்கள் இந்த லிங்க்’ஐ கிளிக் செய்து தமிழிலேயே டைப் செய்து கருத்தேற்றலாம்.

Thanks & Regards,

King Viswa.